సినిమా టికెట్ ధరల స్థిరీకరణ, థియేటర్ల నిర్వహణపై ప్రభుత్వం జారీ చేసిన జీవో 77 (GO 77) తమకు తీవ్ర నష్టాన్ని కలిగిస్తుందని తెలంగాణ ఎగ్జిబిటర్ల అసోసియేషన్ ఆరోపిస్తోంది. ఈ నిబంధనలను వెంటనే రద్దు చేయాలని లేదా సవరించాలని కోరుతూ ముఖ్యమంత్రి రేవంత్ రెడ్డికి వారు లేఖ రాశారు.
రాష్ట్రంలోని 33 జిల్లాల్లో ఉన్న 400కు పైగా థియేటర్ల యాజమాన్యాలను, తెలంగాణ ఫిల్మ్ ఛాంబర్ ఆఫ్ కామర్స్ను సంప్రదించకుండానే ప్రభుత్వం ఈ నిర్ణయం తీసుకుందని ఎగ్జిబిటర్లు చెబుతున్నారు. కేవలం కొందరు బడా నిర్మాతలు, ‘తెలుగు యాక్టివ్ ప్రొడ్యూసర్స్ గిల్డ్’కు లబ్ధి చేకూర్చేందుకే ఈ నిబంధనలు తెచ్చారని వారు అనుమానం వ్యక్తం చేస్తున్నారు.
ప్రస్తుతం రాష్ట్రంలో 390కి పైగా ఎయిర్ కూల్డ్ (ఏసీ లేని) థియేటర్లు ఉన్నాయి. వీటిని ఏసీ థియేటర్లుగా మార్చాలని ప్రభుత్వం అడుగుతుండగా, ఒక్కో స్క్రీన్కు రూ. 60 నుండి 80 లక్షల వరకు ఖర్చవుతుందని ఎగ్జిబిటర్లు వివరిస్తున్నారు. ఇప్పటికే అప్పులు చేసి థియేటర్లను ఆధునీకరించామని, ఇప్పుడు కొత్త నిబంధనల వల్ల నిర్వహణ భారం పెరిగిందని వారు ఆవేదన చెందుతున్నారు.
గడిచిన మూడేళ్లలో థియేటర్ల ఆధునీకరణ కోసం రూ. 300 కోట్లు ఖర్చు చేశామని ఎగ్జిబిటర్లు పేర్కొన్నారు. ఈ సినిమా హాళ్లపై ప్రత్యక్షంగా, పరోక్షంగా 20 వేల కుటుంబాలు ఆధారపడి జీవిస్తున్నాయి. కొత్త వర్గీకరణల వల్ల ఈ కుటుంబాల ఉపాధి ప్రమాదంలో పడిందని వారు ఆందోళన చెందుతున్నారు.
జీవో 77లో టికెట్ ధరల వర్గీకరణ, ప్రీమియం, నాన్-ప్రీమియం ధరల విషయంలో గందరగోళం ఉందని అసోసియేషన్ ప్రతినిధులు తెలిపారు. ఎంసీ ఛార్జీలను పెంచాల్సిన అవసరం ఉందని వారు కోరుతున్నారు. చిత్ర పరిశ్రమకు వెన్నెముకగా ఉన్న ఎగ్జిబిటర్ల శ్రేయస్సును దృష్టిలో ఉంచుకుని, ముఖ్యమంత్రి రేవంత్ రెడ్డి ఈ వ్యవహారంలో జోక్యం చేసుకుని న్యాయం చేయాలని వారు విజ్ఞప్తి చేస్తున్నారు.
