బెంగళూరులో జరుగుతున్న దులీప్ ట్రోఫీ (భారత దేశవాళీ క్రికెట్ టోర్నమెంట్) క్వార్టర్ ఫైనల్ మ్యాచ్లలో ఆదివారం తొలి రోజు ఆట ముగిసింది. నార్త్ ఈస్ట్ జోన్తో జరుగుతున్న మ్యాచ్లో ఈస్ట్ జోన్ బ్యాటర్లు అద్భుతమైన ప్రదర్శన చేశారు.
ఈస్ట్ జోన్ తరఫున సుదీప్ కుమార్ ఘరామి 146 పరుగులు, షాబాజ్ అహ్మద్ 100 పరుగులతో నాటౌట్గా నిలిచి సెంచరీలు పూర్తి చేశారు. కుమార కుశాగ్ర 55 పరుగులతో రాణించడంతో, తొలి రోజు ఆట ముగిసే సమయానికి ఈస్ట్ జోన్ 6 వికెట్ల నష్టానికి 355 పరుగులు చేసింది. ప్రస్తుతం షాబాజ్ అహ్మద్తో పాటు అనుకుల్ రాయ్ 22 పరుగులతో క్రీజ్లో ఉన్నారు.
మరోవైపు వెస్ట్ జోన్, నార్త్ జోన్ మధ్య జరుగుతున్న క్వార్టర్ ఫైనల్ మ్యాచ్లో బౌలర్ల హవా కొనసాగింది. మొదట బ్యాటింగ్ చేసిన నార్త్ జోన్ జట్టు 251 పరుగులకే ఆలౌట్ అయింది. అంశుల్ కాంబోజ్ 60 పరుగులు, ఆయుష్ బాదాని 51 పరుగులతో అర్థ శతకాలు సాధించగా, ఆయుష్ దోసేజా 42 పరుగులు చేశారు.
వెస్ట్ జోన్ బౌలర్లలో తనుష్ కొటియన్, తుషార్ దేశ్ పాండే చెరో 4 వికెట్లు తీసి ప్రత్యర్థిని కట్టడి చేశారు. ముకేశ్ చౌదరి, శార్దూల్ ఠాకూర్ ఒక్కో వికెట్ పడగొట్టారు.
తర్వాత బ్యాటింగ్కు దిగిన వెస్ట్ జోన్ జట్టు ప్రారంభంలోనే తడబడింది. ఓపెనర్లు పృథ్వీ షా 22 పరుగులు, హర్విక్ దేశాయ్ 3 పరుగులకే వెనుదిరిగారు. ఆట ముగిసే సమయానికి వెస్ట్ జోన్ 2 వికెట్ల నష్టానికి 31 పరుగులు మాత్రమే చేసింది.
