ప్రముఖ హాలీవుడ్ స్టూడియో వాల్ట్ డిస్నీ కంపెనీ, సోషల్ మీడియా ప్లాట్ఫామ్ టిక్టాక్ ఒక కీలక ఒప్పందాన్ని కుదుర్చుకున్నాయి. ఈ భాగస్వామ్యం ద్వారా టిక్టాక్ క్రియేటర్లు మార్వెల్, పిక్సర్, స్టార్ వార్స్, ఎఫ్ఎక్స్ వంటి డిస్నీ టైటిల్స్ నుంచి పాత్రలు, సన్నివేశాలను తమ షార్ట్-ఫార్మ్ వీడియోల కోసం వినియోగించుకోవచ్చు. ఒక ప్రధాన హాలీవుడ్ స్టూడియో ఇలాంటి సోషల్ మీడియా ప్లాట్ఫామ్తో ఒప్పందం చేసుకోవడం ఇదే మొదటిసారి.
ఈ ఒప్పందంలో భాగంగా 'వెర్ట్స్' అనే కొత్త వర్టికల్ వీడియో విభాగం అందుబాటులోకి రానుంది. ఎంపిక చేసిన క్రియేటర్ల వీడియోలను టిక్టాక్, డిస్నీ+ ప్లాట్ఫామ్లలో ప్రదర్శిస్తారు. రాబోయే నెలల్లో అమెరికాలో పైలట్ ప్రోగ్రామ్ ప్రారంభించి, ఆ తర్వాత అంతర్జాతీయ మార్కెట్లకు విస్తరించాలని కంపెనీలు నిర్ణయించాయి. ఈ ఒప్పందం ఆర్థిక వివరాలను మాత్రం వెల్లడించలేదు.
దీనితో పాటు 'డిస్నీ క్రియేటర్ అంబాసిడర్ ప్రోగ్రామ్'ను కూడా ప్రారంభించారు. ఇందులో పాల్గొనే క్రియేటర్లకు ప్రత్యేక రివార్డులు, ఎక్స్క్లూజివ్ ఈవెంట్లకు ఆహ్వానాలు, కెరీర్ డెవలప్మెంట్ అవకాశాలు లభిస్తాయి. డిస్నీ+ చందాదారులను మరింతగా ఆకర్షించడానికి, కమ్యూనిటీలను బలోపేతం చేయడానికి ఈ కంటెంట్ ఉపయోగపడుతుందని కంపెనీలు భావిస్తున్నాయి.
టిక్టాక్ అంతర్గత డేటా ప్రకారం, గత ఏడాది యూజర్లు సినిమాలు, టీవీ షోలకు సంబంధించి రోజుకు సగటున 6.5 మిలియన్ పోస్ట్లు షేర్ చేశారు. టిక్టాక్లో కంటెంట్ చూసిన వారిలో దాదాపు సగం మంది ఆ తర్వాత స్ట్రీమింగ్ సర్వీస్ లేదా టీవీలో ఆ షోలను చూశారని కంపెనీ పేర్కొంది. ఈ ఒప్పందం డిస్నీ స్ట్రీమింగ్ వ్యూహాల్లో భాగంగా జోష్ డి'అమారో ఆధ్వర్యంలో చేపట్టిన మొదటి ప్రధాన కార్యక్రమం.
