దక్షిణ మధ్య రైల్వే తన పరిధిలోని రైల్వే స్టేషన్లు, రైళ్లలో ఆగస్టు 24 నుంచి 26 వరకు మూడు రోజుల పాటు భారీ టికెట్ తనిఖీ డ్రైవ్ను నిర్వహించింది. ఈ తనిఖీల్లో భాగంగా టికెట్ లేకుండా ప్రయాణిస్తున్న 13,964 మందిని, సరైన అనుమతి లేని లగేజీతో ఉన్న 1,189 మందిని అధికారులు గుర్తించారు. వీరి నుంచి మొత్తం రూ. 1.28 కోట్ల జరిమానాను వసూలు చేశారు.
పండుగలు, సెలవుల సమయంలో రైళ్లలో రద్దీ ఎక్కువగా ఉంటుంది. ఈ సమయంలో ప్రయాణికులు ఇబ్బంది పడకుండా, అసలైన టికెట్ ఉన్న వారికి సౌకర్యవంతమైన ప్రయాణాన్ని అందించడమే లక్ష్యంగా రైల్వే శాఖ ఈ చర్యలు చేపట్టింది. అనధికారిక ప్రయాణాలను అరికట్టడం ద్వారా ప్రయాణికుల భద్రతను, సౌకర్యాన్ని మెరుగుపరచాలని రైల్వే భావిస్తోంది.
కేవలం టికెట్ తనిఖీలే కాకుండా, రైల్వే ఆవరణలో నిబంధనల ఉల్లంఘనలపై కూడా అధికారులు దృష్టి సారించారు. రైల్వే ప్రాంగణంలో చెత్త వేసిన 37 మంది నుంచి రూ. 6,400, అనుమతి లేకుండా వ్యాపారం చేస్తున్న 5 గురి నుంచి రూ. 10,000 జరిమానా వసూలు చేశారు. అలాగే, రైళ్లలో ధూమపానం చేసిన 7 గురి నుంచి రూ. 14,000 జరిమానాగా రాబట్టారు.
తనిఖీల సమయంలో ప్రయాణికులకు రైల్వే సిబ్బంది అవగాహన కల్పించారు. సరైన టికెట్లతో ప్రయాణించడం, రైళ్లలో పొగతాగడం వల్ల కలిగే అగ్నిప్రమాదాల గురించి, పరిశుభ్రత ప్రాముఖ్యత గురించి వివరించారు. నిబంధనలను తప్పనిసరిగా పాటించాలని ప్రయాణికులకు రైల్వే శాఖ విజ్ఞప్తి చేసింది.
ఈ తనిఖీ డ్రైవ్ను విజయవంతంగా నిర్వహించిన వాణిజ్య విభాగాన్ని దక్షిణ మధ్య రైల్వే జనరల్ మేనేజర్ సంజయ్ కుమార్ శ్రీవాస్తవ అభినందించారు. భవిష్యత్తులో కూడా నిబంధనల అమలుపై రైల్వే శాఖ కఠినంగా వ్యవహరించే అవకాశం ఉంది.
