భారీ ప్రచారాలు, పెద్ద స్టూడియోల మద్దతు లేకపోయినా చైనాకు చెందిన 'నియు లాయ్' (Niu Lai) అనే యానిమేషన్ చిత్రం బాక్సాఫీస్ వద్ద అనూహ్య విజయాన్ని నమోదు చేస్తోంది. ఆగస్టు 5న థియేటర్లలో విడుదలైన ఈ సినిమా, మొదట్లో ప్రేక్షకులను పెద్దగా ఆకట్టుకోలేకపోయింది.
ప్రారంభ పది రోజుల్లో ఈ సినిమా కేవలం 10 వేల యువాన్లు, అంటే సుమారు 1,400 డాలర్ల వసూళ్లను మాత్రమే సాధించింది. కొన్ని రోజులైతే రోజువారీ కలెక్షన్లు కేవలం 200 యువాన్లకు పడిపోయాయని బాక్సాఫీస్ గణాంకాలు చెబుతున్నాయి. అయితే, ఆ తర్వాత పరిస్థితి పూర్తిగా మారిపోయింది.
సినిమాలోని విచిత్రమైన విజువల్స్, యానిమేషన్ నాణ్యతపై సోషల్ మీడియాలో వచ్చిన విమర్శలు, మీమ్స్ ఈ చిత్రానికి ఊహించని ప్రచారాన్ని తెచ్చిపెట్టాయి. దీంతో సినిమా ఎలా ఉందో చూడాలనే ఆసక్తి పెరిగి, థియేటర్లకు ప్రేక్షకులు భారీగా తరలివచ్చారు. ఫలితంగా ఆగస్టు 20 నాటికి ఈ చిత్రం 4 మిలియన్ డాలర్లకు పైగా వసూలు చేసింది.
ప్రస్తుతం ఈ సినిమా రోజువారీ బాక్సాఫీస్ ర్యాంకింగ్స్లో హాలీవుడ్ చిత్రం 'స్పైడర్ మ్యాన్: బ్రాండ్ న్యూ డే' తర్వాతి స్థానంలో నిలవడం విశేషం. ఈ చిత్రాన్ని అమేచ్యూర్ యానిమేటర్ షిన్ యుమెంగ్, ఆయన తల్లి సన్ లిఫాంగ్ కలిసి ఐదేళ్ల పాటు రూపొందించారు.
ఈ సినిమా నిర్మాణ వ్యయంపై భిన్నమైన కథనాలు వినిపిస్తున్నాయి. బడ్జెట్ కేవలం 200 డాలర్లు అని కొందరు చెబుతుండగా, మరికొందరు కొన్ని వేల డాలర్లు ఖర్చయిందని పేర్కొంటున్నారు. ఈ ఖర్చుపై అధికారిక స్పష్టత రావాల్సి ఉంది.
భారీ బడ్జెట్ కంటే ప్రేక్షకులను ఆకట్టుకునే కంటెంట్ ఉంటే చిన్న సినిమా కూడా విజయం సాధించగలదని 'నియు లాయ్' నిరూపించింది. స్టార్ హీరోలు లేకపోయినా, ఈ చిత్రం చైనా సినీ పరిశ్రమలో చర్చనీయాంశంగా మారింది.
