అజర్బైజాన్ వేదికగా జరుగుతున్న అండర్-17 ప్రపంచ కుస్తీ ఛాంపియన్షిప్లో భారత యువ కుస్తీ క్రీడాకారులు అద్భుతమైన ప్రదర్శనతో ఐదు పతకాలను ఖాతాలో వేసుకున్నారు. పురుషుల ఫ్రీస్టైల్ విభాగంలో 48 కిలోల కేటగిరీలో ఆర్యన్ రజత పతకాన్ని కైవసం చేసుకున్నారు. ఫైనల్ పోరులో కజకిస్తాన్కు చెందిన బక్డౌలెట్ అగాబెక్ చేతిలో 0-10 తేడాతో ఓటమి పాలైనప్పటికీ, ఆర్యన్ అద్భుతమైన పోరాట పటిమను ప్రదర్శించారు.
55 కిలోల విభాగంలో ప్రతమేశ్ సూర్యకాంత్ పాటిల్ కాంస్య పతక పోరులో అమెరికాకు చెందిన చేస్ కరెన్బౌర్పై 8-0 తేడాతో విజయం సాధించి పతకాన్ని దక్కించుకున్నారు. అలాగే, 110 కిలోల హెవీవెయిట్ విభాగంలో అరుష్ రాణా కజకిస్తాన్కు చెందిన సాగిండిక్ టెమిర్గాలీపై 9-1 పాయింట్ల తేడాతో గెలిచి కాంస్య పతకాన్ని సొంతం చేసుకున్నారు. ఇటీవల ఆసియా ఛాంపియన్షిప్లో స్వర్ణం గెలిచిన అరుష్ రాణా, ఈ పోటీలోనూ తన ఆధిపత్యాన్ని కొనసాగించారు.
మహిళా కుస్తీ విభాగంలోనూ భారత క్రీడాకారిణులు సత్తా చాటారు. 46 కిలోల విభాగంలో సంధ్యా విష్ణోయ్ రజత పతకాన్ని సాధించగా, అక్షర (53 కిలోలు), నికితా సెహ్రావత్ (57 కిలోలు) కూడా రజత పతకాలను గెలుచుకున్నారు. వీరితో పాటు కామ్నా బాబల్ (49 కిలోలు), అవంశిక (61 కిలోలు), తానియా (69 కిలోలు), గరిమా (73 కిలోలు) కాంస్య పతకాలను సాధించి భారత్ ఖాతాలో పతకాల సంఖ్యను పెంచారు.
ఈ ఛాంపియన్షిప్ ఆదివారంతో ముగియనుంది. మిగిలిన పురుషుల ఫ్రీస్టైల్ విభాగాలైన 45, 51, 60, 71 మరియు 92 కిలోల కేటగిరీల్లో భారత క్రీడాకారులు పతకాల కోసం తమ అదృష్టాన్ని పరీక్షించుకోనున్నారు.
