2025లో AI ఆధారిత మోసాలు సాధారణ మోసాల కంటే వేగంగా పెరిగాయని బ్రోకర్ చూజర్ (BrokerChooser) తాజా విశ్లేషణలో వెల్లడైంది. ఫెడరల్ బ్యూరో ఆఫ్ ఇన్వెస్టిగేషన్ (FBI)కు AI మోసాలకు సంబంధించి 22,000కు పైగా ఫిర్యాదులు అందాయి. వీటి వల్ల జరిగిన మొత్తం ఆర్థిక నష్టం 890 మిలియన్ డాలర్లుగా నమోదైంది.
ఈ మోసాల్లో ఇన్వెస్ట్మెంట్ స్కామ్లు అత్యధికంగా ఉన్నాయి. కేవలం ఈ ఒక్క విభాగంలోనే 4,356 ఫిర్యాదులు నమోదు కాగా, బాధితులు 632 మిలియన్ డాలర్లను కోల్పోయారు. విస్కాన్సిన్ రాష్ట్రంలో AI సంబంధిత మోసాలు అత్యధికంగా నమోదవ్వగా, వాషింగ్టన్ డీసీలో ఒక్కో కేసులో సగటున 1,14,080 డాలర్ల నష్టం వాటిల్లింది.
AIని ఉపయోగించి మోసగాళ్లు అసలైన ఆర్థిక సంస్థలు, ఇన్వెస్ట్మెంట్ కంపెనీల మాదిరిగా నటిస్తూ ప్రజలను బురిడీ కొట్టిస్తున్నారు. దీనివల్ల సాధారణ ప్రజలు సులభంగా మోసపోతున్నారని నిపుణులు హెచ్చరిస్తున్నారు.
మోసాల బారిన పడకుండా ఉండాలంటే, ఏదైనా సంస్థ వివరాలను స్వతంత్రంగా ధృవీకరించుకోవాలని నిపుణులు సూచిస్తున్నారు. ముఖ్యంగా, మోసగాళ్లు ఇచ్చే కాంటాక్ట్ వివరాలను నమ్మకుండా, అధికారిక సమాచారాన్ని మాత్రమే సంప్రదించాలని వారు స్పష్టం చేస్తున్నారు.
