దేశీయ విమాన ప్రయాణాలకు సంబంధించి ఎయిరిండియా కొత్త బేసిక్ ఫేర్ ఫ్యామిలీ ఆప్షన్ ను అందుబాటులోకి తెచ్చింది. సామాన్య మరియు మధ్యతరగతి ప్రయాణికులకు అతి తక్కువ ఖర్చుతో విమాన ప్రయాణాన్ని అందించే ఉద్దేశంతో ఈ నిర్ణయం తీసుకున్నట్లు ఆ సంస్థ వెల్లడించింది.
ఈ కొత్త ప్లాన్ కింద ప్రయాణించేవారికి ఉచిత భోజన సౌకర్యం అందుబాటులో ఉండదు. కేవలం టీ, కాఫీ వంటి పానీయాలు మాత్రమే అందిస్తారు. అయితే ప్రయాణికులు తమ ఇష్టానుసారం విడిగా ఆహారాన్ని బుక్ చేసుకోవచ్చు. వెజ్, నాన్ వెజ్, జైన్ మరియు డయాబెటిక్ మీల్స్ ఎంపికలు కూడా అందుబాటులో ఉంటాయి.
బేసిక్ ఫేర్ ఎంపిక చేసుకున్నవారికి 15 కిలోల చెక్-ఇన్ బ్యాగేజీ (విమానంలో సరకుగా పంపే సంచి) మరియు 7 కిలోల కేబిన్ బ్యాగేజీ (ప్రయాణికుడు తీసుకెళ్లే సంచి) అనుమతి ఉంటుంది. ప్రయాణానికి 24 గంటల ముందు వరకు టికెట్లు బుక్ చేసుకునే అవకాశం కల్పించారు. ఇది పూర్తిగా స్వచ్ఛంద ఎంపిక కాగా, ఎకానమీ క్లాస్ ప్రయాణికులపై ఆర్థిక భారాన్ని తగ్గించడానికి ఇది ఉపయోగపడుతుంది.
ప్రస్తుతం ఎంపిక చేసిన కొన్ని మార్గాల్లో మాత్రమే ఈ సేవలు అందుబాటులో ఉన్నాయి. ప్రయాణికుల స్పందనను బట్టి భవిష్యత్తులో ఈ ఛార్జీలను కొనసాగించే విషయంపై నిర్ణయం తీసుకుంటారు. బేసిక్ ఫేర్ తో పాటు వేల్యూ, క్లాసిక్, ఫ్లెక్స్ టికెట్ ఆప్షన్లు కూడా కొనసాగుతాయని, వాటిలో ఉచిత భోజనంతో పాటు ఇతర ప్రయోజనాలు ఉంటాయని ఎయిరిండియా స్పష్టం చేసింది.
