పశ్చిమ బెంగాల్ టీఎంసీ అధ్యక్షురాలు చంద్రిమ భట్టాచార్య శనివారం రాజీనామా చేశారు. రాష్ట్ర పార్టీ చీఫ్ పదవికి జూన్ మూడో తేదీన పదవీ భారం వహించి కేవలం నెల రోజుల్లోనే ఈ నిర్ణయం తీసుకున్నారు. పార్టీ ప్రధాన కార్యాలయంలో తిరుగుబాటుదారులు సమావేశం ఏర్పాటు చేసుకున్న విషయం ఆమెకు అవమానంగా అనిపించిందని ఆమె తెలిపారు.
చంద్రిమ మమతా బెనర్జీకి రాజీనామా లేఖలో పార్టీ ఆఫీస్ను తిరుగుబాటుదారులకు ఉద్దేశపూర్వకంగా అప్పగించినట్లు మమత ఆరోపించడం ఆమెకు అసహ్యం కలిగించిందని పేర్కొన్నారు. పార్టీకి విశ్వాసపాత్రురాలిగా ఉన్నందుకు దక్కే బహుమతి ఇదేనా అని ఆమె ప్రశ్నించారు. అంత అవమానం జరిగాక పార్టీలో ఉండటం సబబుకాదని ఆమె అన్నారు.
చంద్రిమ పార్టీ సభ్యత్వంతో పాటు పార్టీ అనుబంధ సంస్థలు, పార్టీకి చెందిన బ్యాంక్ ఖాతాలకు సంతకం చేసే హోదాను కూడా వదిలివేశారు. పార్టీలో కీలక పాత్ర పోషించిన ఆమె గతంలో రాష్ట్ర ఆర్థిక, ఆరోగ్య మంత్రిగా పనిచేశారు. సుబ్రతా భక్షీ స్థానంలో జూన్ మూడో తేదీన పార్టీ చీఫ్ అయ్యారు.
మమతా బెనర్జీ ఈ చీలికకు బీజేపీనే కారణం అని ఆరోపించారు. టీఎంసీలో చీలిక తెచ్చి వేరుకుంపటి పెట్టిన ద్రోహులకు బీజేపీలో చేరండి అని ఆమె అన్నారు. ఎన్నికలకు ముందు ఈ తిరుగుబాటుదారులు ఎక్కడున్నారు అని ఆమె ప్రశ్నించారు. బీజేపీ మద్దతుతో నమ్మకద్రోహ క్రీడ ఆడకండి అని ఆమె హెచ్చరించారు.
చంద్రిమ త్వరలోనే టీఎంసీ తిరుగుబాటుదారుల శిబిరాన్ని ఆశ్రయించబోతున్నారని సమాచారం.
