తెలియని నంబర్ల నుంచి కాల్ వచ్చి ఎత్తగానే మరోవైపు మాటలు లేకుండా లైన్ కట్ అవుతుంటే అది ప్రమాద సంకేతం. ఇలా ఫోన్ ఎత్తి స్పందించిన వెంటనే మీ నంబర్ పనిచేస్తున్నట్లు నేరగాళ్లు గుర్తిస్తారు. ఈ సమాచారాన్ని ఆధారంగా చేసుకుని భవిష్యత్తులో భారీ మొత్తంలో మోసాలకు పాల్పడే అవకాశం ఉంది.
ఇండియన్ సైబర్ క్రైమ్ కోఆర్డినేషన్ సెంటర్ అనే సంస్థ ఈ విషయమై ప్రజలకు అలర్ట్ జారీ చేసింది. నేరగాళ్లు ఆటోమేటెడ్ సిస్టమ్స్ సహాయంతో ఏయే నంబర్లు యాక్టివ్గా ఉన్నాయో పరీక్షిస్తున్నారు. బాధితులు సమాధానం ఇవ్వడంతోనే ఆ నంబర్లు వారి డేటాబేస్లో నమోదైపోతాయి.
నంబర్ యాక్టివ్ అని నిర్ధారించుకున్న తర్వాత ఫిషింగ్ కాల్స్, నకిలీ కస్టమర్ కేర్ మోసాలు, పెట్టుబడి మోసాలు లేదా ఓటీపీ అంటే వన్ టైమ్ పాస్వర్డ్ చోరీకి పాల్పడతారు. ఒకసారి ధృవీకరించిన నంబర్కు రోజూ వేల సంఖ్యలో స్పామ్ కాల్స్ వచ్చే ప్రమాదం ఉంది. ఇది వ్యక్తిగత గోప్యతకే కాకుండా ఆర్థిక భద్రతకు కూడా పెను ముప్పుగా మారుతుంది.
సైబర్ నిపుణుల సలహా మేరకు అపరిచిత కాల్స్, మెసేజ్లు లేదా అనుమానాస్పద లింక్ల విషయంలో అప్రమత్తంగా ఉండాలి. తెలియని వ్యక్తులతో వ్యక్తిగత సమాచారాన్ని పంచుకోకపోవడమే సురక్షితంగా ఉండే ఏకైక మార్గం. భద్రత విషయంలో నిర్లక్ష్యం వహించకుండా జాగ్రత్తలు తీసుకోవాలి.
