బుధవారం నాడు తెలంగాణ మాజీ మంత్రి, బీఆర్ఎస్ డిప్యూటీ ఫ్లోర్ లీడర్ హరీశ్రావు ముఖ్యమంత్రి రేవంత్రెడ్డికి ఒక లేఖ రాశారు. తెలంగాణ రాష్ట్ర సాధనలో నీటి హక్కుల రక్షణ కీలకమైనదని, కర్ణాటక తుంగభద్రపై నిర్మిస్తున్న అక్రమ ప్రాజెక్టులను వెంటనే నిలిపివేయాలని ఆయన డిమాండ్ చేశారు.
సమైక్య పాలనలో తెలంగాణకు జరిగిన అన్యాయాల్లో నీటి దోపిడీ ఒకటి అని హరీశ్రావు పేర్కొన్నారు. బీఆర్ఎస్ ప్రభుత్వం గోదావరి, కృష్ణా జలాలను మళ్లించి పాలమూరు వంటి వలస జిల్లాలను పచ్చగా మార్చిందని, కానీ కాంగ్రెస్ ప్రభుత్వం నీటి హక్కుల పట్ల నిర్లక్ష్యం చూపిందని విమర్శించారు. ఆంధ్రప్రదేశ్తో కలిసి నదుల అనుసంధానం పేరుతో జలాలను దొంగిలించడానికి కర్ణాటక ప్రభుత్వానికి సహాయం చేస్తున్నారని ఆరోపించారు.
కొడంగల్ లిఫ్ట్ ప్రాజెక్టుకు ఎన్వోసీ ఇవ్వడం వెనుక ఉన్న మతలబును తెలుసుకోవాలని హరీశ్రావు కోరారు. పాలమూరు-రంగారెడ్డి ప్రాజెక్టు పూర్తయితే నారాయణపేట్, కొడంగల్లకు నీటి సరఫరా తగ్గుతుందని, తర్వాతి తరాలు ప్రమాదంలో పడతారని హెచ్చరించారు. సీడ్బ్ల్యూసీ, కేఆర్ఎంబీ, కేంద్ర జలశక్తి మంత్రిత్వ శాఖకు అధికారిక అభ్యంతరాలు తెలియజేయాలని, సుప్రీంకోర్టులో కేసు వేయాలని డిమాండ్ చేశారు.
బీఆర్ఎస్ తెలంగాణ నీటి హక్కులను రక్షించడానికి నిరంతరం పోరాడుతుందని, స్వార్థ రాజకీయాల కోసం రాష్ట్ర ప్రయోజనాలను త్యాగం చేయడానికి ఎప్పుడూ అంగీకరించదని హరీశ్రావు స్పష్టం చేసారు. తెలంగాణ, ఆంధ్రప్రదేశ్ల అనుమతులు లేకుండా కర్ణాటక తన ఇష్టానికి తగ్గట్టు ప్రాజెక్టులు నిర్మిస్తే, తెలంగాణ ప్రభుత్వం వెంటనే చర్యలు తీసుకోవాలని ఆయన నొక్కిచెప్పారు.
