విలువల రాజకీయాల నినాదంతో అధికారంలోకి వచ్చిన భారతీయ జనతా పార్టీ (బీజేపీ), గత పన్నెండేండ్లుగా విలువలను ధ్వంసం చేస్తూ విపరీత పోకడలకు పాల్పడుతున్నది. కశ్మీర్కు సంబంధించిన 370వ అధికరణం రద్దు, ప్రణాళికా సంఘాన్ని పక్కన పెట్టడం వంటి నిర్ణయాల తర్వాత, ఒకే దేశం ఒకే ఎన్నిక వంటి ఎజెండాలు అమలు చేయాలనే ఆశతో ప్రజాస్వామ్యాన్ని ప్రహసనంగా మారుస్తున్నది. మోదీ నేతృత్వంలో రెండోసారి పెరిగిన మెజారిటీ ఆధారంగా మూడోసారి 400 సీట్లు సాధిస్తామని ఆశించినా, ఓటర్లు ఆ మెజారిటీని తగ్గించినప్పటికీ ఇతర పార్టీల మద్దతుతో కేంద్రంలో అధికారాన్ని నిలబెట్టుకున్నది.
ప్రస్తుతం పార్లమెంటులో తమ బలాన్ని పెంచుకునేందుకు నియోజకవర్గాల పునర్విభజన, మహిళా రిజర్వేషన్ బిల్లులను ఆమోదింపజేసుకోవడమే లక్ష్యంగా పెట్టుకున్నది. ఈ బిల్లుల కోసం రాజ్యాంగ సవరణ అవసరమని, దానికి కావలసిన మూడింట రెండొంతుల మెజారిటీ లేదని తెలిసి ఉండగానే, విపక్షాలను చీల్చే అనైతిక ఎత్తుగడలకు తెరలేపింది. గవర్నర్ల వ్యవస్థను భ్రష్ఠుపట్టించడం, కేంద్ర దర్యాప్తు సంస్థలను రాజకీయ అవసరాలకు వాడటం, జాతీయ న్యాయ నియామక మండలి (ఎన్జాక్) ద్వారా న్యాయవ్యవస్థపై పట్టు సాధించాలని ప్రయత్నించి సుప్రీంకోర్టు చేతిలో విఫలమవడం వంటి చర్యలు ఇందుకు నిదర్శనం.
బెంగాల్ ఎన్నికల తర్వాత తృణమూల్ కాంగ్రెస్ పార్టీని చీల్చి, ఆ పార్టీకి చెందిన 20 మంది ఎంపీలను అధికారికంగా నమోదు కాని త్రిపురకు చెందిన ఎన్సీపీఐ (నేషనల్ సిటిజన్స్ పార్టీ ఆఫ్ ఇండియా)లో చేర్చి, ఎన్డీయే కూటమికి మద్దతు ప్రకటించుకున్నది. ఇక మహారాష్ట్రలో ఉద్ధవ్ బాల్ ఠాక్రే వర్గంలో ఉన్న 9 మంది ఎంపీల్లో ఆరుగురు, షిండే వర్గంలో చేరుతామని ప్రకటించడంతో శివసేనలో మరో చీలికకు తెరలేచింది. ఈ చీలికల వెనుక బీజేపీ పాత్ర ఉన్నదని, ఫిరాయింపు ఎంపీలకు భారీగా డబ్బు ఆశ చూపారనే ఆరోపణలు వెల్లువెత్తుతున్నాయి.
ఢిల్లీలో ఆప్ నుంచి మహారాష్ట్రలో ఎన్సీపీ వరకు చీలిక ఎత్తుగడలకు బలికాని ప్రాంతీయ పార్టీలు చాలా తక్కువగా మిగిలాయి. విలువల పేరిట కాంగ్రెస్పై పోరాడిన బీజేపీ, ఇప్పుడు అదే కాంగ్రెస్ తెచ్చిన ఫిరాయింపు వ్యతిరేక చట్టాన్ని సాధనంగా మార్చుకుని, ప్రజాస్వామ్యాన్ని అపహాస్యం చేస్తున్నదని విమర్శలు వస్తున్నాయి. ఎన్నికల వ్యవస్థను అడ్డుపెట్టుకుని తమవారిని పార్లమెంటుకు పంపే యత్నాలు కూడా ఆ పార్టీ వెనుకాడటం లేదు.
